Çfarë duhet të dini për Kalanë e Bashtovës

Kalaja e Bashtovës, në rrethin e Kavajës është ndërtuar 12 km larg rrugës antike “EGNATIA”, ndodhet pranë fshatit Vilë-Bashtovë. Kalaja është ndërtuar në një terren fushor dhe koha më e mundshme e ndërtimit të saj është fundi i shek. 15-të.

Gjatë mesjetës zona quhej Vrego ose Briego dhe ishte e njohur si një port në lumin Shkumbin, qendër e tregëtimit të drithrave, sidomos gjatë gjysmës së dytë të shek. 14-të. Kalaja u ndërtua në shek. 15-të dhe u përdor nga Venedikasit deri në vitin 1478 kur u pushtua nga Osmanët.

 

Monumenti paraqet një planimetri katërkëndore me lartësi të mureve 9 m dhe 7 kulla. Pjesa perëndimore e saj është rindërtuar në shek. 18. Kalaja është shpallur monument kulture i kategorisë së parë në 1948 dhe 1971, ndërkohë që zona përreth saj ruan statusin e parkut natyror kombëtar.

 

Gjatë periudhës osmane monumenti kishte funksionin kryesor të mbrojtjes së tregtisë bregdetare duke u shpallur edhe port i lirë në vitin 1780. Në kompozimin e tij ai paraqet një shembull të ndërthurjes së stilit të arkitekturës veneciane me traditat ndërtimore osmane.