Çfarë është Feng Shui?

Feng Shui është një disiplinë e lashtë kineze që studion energjitë natyrore të mjedisit dhe veçoritë e ndryshme mangnetike që depërtohen nga drejtime të ndryshme. Fjalë për fjalë “feng” do të thotë “erë” dhe “shui” do te thotë “ujë”. Ndërveprimi i këtyre dy elementeve esencialë për jetën përshkruajnë energjinë thelbësore, ose “Chi”, që është dhe baza e Feng Shui. Feng Shui është arti që ka të bëjë me sinkronizimin e forcave të natyrës dhe harmonizimin e njeriut me ambjentin, banesën, zyrën etj. Pra, ky art përmbledh forcat e natyrës në atë mënyrë që të krijohet harmonia dhe pozitiviteti. Të gjithëve mund të na ketë ndodhur që të kemi hyrë në një banesë apo zyrë për herë të parë dhe të na ketë përshkuar herë një ndjenjë e këndshme e pashpjegueshme dhe herë një ndjenjë parehatie. Shumë i praktikuar në mbarë Azinë e në shumë vende perëndimore sot, ky sistem shpjegon konceptin se si energjia elektromagnetike apo “Chi” lidh njerëzit me botën rreth tyre. Feng Shui nuk ka lidhje me ndryshimin e fatit, por na ndihmon të krijojmë një hapësirë që nxit ndjenjën e lumturisë dhe të mirëqënies.