Cilët janë pronarët që do të kompensohen?
Agjencia e Trajtimit të Pronave ( ATP) zbardh hartën me katalogun e objekteve shtetërore që do përdoren për kompensimin e pronarëve.
Janë 175 pronarë trojesh që do të kompensohen me ligjin e ri dhe pronarët që kanë prioritet
për kompensim fizik në pronat e lira në 12 qarqe të vendit.
ATP ka publikuar listën e objekteve që do të shërbejnë për kompensimin fizik, pas inventarizimit të pronave në vend. Me ligjin në fuqi, kompensimi fizik aplikohet si formë alternative e kompensimit dhe do të ketë përparësi mbi kompensimin financiar. Sipas rregullave të reja, pronarët fitojnë kompensim fizik, vetëm nëse disponojnë një vendim përfundimtar njohjeje të pronës. Në ATP, ata duhet të paraqesin një kërkesë për kompensimin fizik së bashku vendimin përfundimtar të ish-AKKP-së, ish-ZRKKP-së, ish-KKKP-së apo vendimin gjyqësor përkatës, që njeh të drejtën e kthimit dhe kompensimit të pronës, shoqëruar me planvendosjen e vendimit; vërtetim nga zyrat e regjistrimit të pasurive të paluajtshme për statusin juridik të pronës që kërkohet, shoqëruar me kartelën e pasurisë dhe hartën treguese dhe vërtetimin nga bashkia se sipërfaqja e tokës nuk ka funksion publik.
Trojet
Për kryerjen e kompensimit fizik, prioritet kanë pronat publike brenda zonave me përparësi zhvillimin e turizmit, të përcaktuara në mbështetje të ligjit “Për zhvillimin e zonave që kanë përparësi turizmin”. Trojet e dhëna me kompensim në zonat turistike duhet të përdoren vetëm në përputhje me masterplanin për zhvillimin e turizmit dhe planet rregulluese respektive të territorit, të miratuara në zbatim të tij. Vlera e pronës që kompensohet nxirret, duke u bazuar në çmimin e tregut, llojin e pasurisë dhe qëllimin e përdorimit të saj, sipas standardeve ndërkombëtare të vlerësimit të pasurisë së paluajtshme. Procesit të vlerësimit të pronës, i nënshtrohet toka dhe objektet ndërtimore. Në këto të fundit përfshihen ndërtesat dhe strukturat inxhinierike, që e gëzojnë këtë cilësi sipas legjislacionit.
Listën e gjeni këtu:
