Trashëgimia historike dhe kulturore e Kalasë së Ulqinit

Kalaja e Ulqinit e njohur si Qyteti i vjetër i Ulqinit, është monument kulture i kategorisë I në Mal të Zi dhe lagje e Ulqinit.

U themelua në shekullin e V p.e.s. nga ilirët, kolhët, nga të cilët është quajtur fillimisht Kolihinium. Në shekullin II p.e.s. u mor nga romakët prej fisit ilir Olciniatas dhe pastaj qyteti nga Kolhinium bëhet Olcinium.

Gjatë sundimit romak Olciniumi bëhet qytet me status të veçantë e me privilegje.

Ulqini është një qytet, muret e të cilit janë shkatërruar shpesh në luftëra. Kalaja është e vendosur mbi një shkëmb të madh, pjesët më të ulta e të cilit janë pothuajse në breg. Muzeu i parë digjital në Mal të Zi, përmes animacionit tredimensional, prezanton një pjesë të trashëgimisë historike dhe kulturore të Ulqinit.

Në Kalanë e Ulqinit vijon ndërtimi ose rinovimi i objekteve, kryesisht investime private të banorëve të Kalasë dhe të pronarëve të komplekseve turistike. Rrugicat e ngushta, godinat e bukura prej guri, të kthyera tashmë në hotele, restorante e bare e kanë bërë tepër të gjallë e të bukur për ta vizituar.

Pamjet nga muret e kalasë janë mahnitëse: sheh qytetin e gjallë të Ulqinit dhe detin. Kalaja ka banorët e saj. Vizita në kala është një mbresë e pashlyer.