Kujdes nga të metat kur blini një pronë të paluajtshme! 

Krahas kontratës së shitjes dhe dokumenteve të tjerë, duhet të kërkoni edhe plotësimin e formularit të marrjes në dorëzim të pronës. Ky akt ju ndihmon të evidentoni të metat e dukshme të pronës dhe të kërkoni prej shitësit ndreqjen ose dëmshpërblimin e tyre. Mbani në vëmendje se të metat e dukshme duhet të konstatohen aty për aty, në çastin e marrjes në dorëzim të pronës dhe jo më vonë, në të kundërt ju e humbisni të drejtën për ndreqjen apo dëmshpërblimin e tyre prej Shitësit. Ndërsa, të metat e fshehta të pronës nuk mund të vërehen me shikim, por shfaqen pas një kohe të caktuar si psh: prania e lagështirës, mosfunksionimi i sistemit hidraulik, elektrik, muraturat apo situata të tjera. Kujdes, ju keni afat vetë 2 vjet nga data e marrjes në dorëzim të pronës, për të ngritur pretendimet ndaj shitësit në lidhje me këto të meta. Përtej këtij afati, ju nuk mund të ngrini asnjë kërkesë tjetër. Në këtë rast, në varësi të llojit të së metës së fshehtë, ju mund të kërkoni që shitësi të kthejë një pjesë të çmimit, apo të ndreqë të metat pa pagesë, ose të kërkoni zgjidhjen përfundimtare të kontratës së shitjes duke i kthyer pronën shitësit dhe marrë mbrapsht cmimin e paguar prej jush si dhe kërkoni shpërblimin e dëmit të shkaktuar.