Lini, një nga fshatrat më piktoresk në Shqipëri

Lini është një nga fshatrat më piktoresk në Shqipëri, i vendosur në një kodër të bukur buzë liqenit të Pogradecit. Shtëpitë janë shumë të vockla të ndërtuara buzë ujit dhe të ngritura puqazi me njëra-tjetrën me shpinë nga kodra, me rrugicat e vogla e të ngushta të shtruara me gurë të vegjël. Lini është një gadishull i vogël në brigjet perëndimore të Liqenit të Ohrit, 22 km nga qyteti i Pogradecit. Dy nga monumentet e zbuluara në gërmime i përkasin shek. V-VI të e.s.
E para, është një godinë kulti, një bazilikë dhe e dyta, jo shumë larg së parës, një ndërtesë banimi. Mozaikët e zbuluar në kodrën e Linit kanë një vlerë të madhe artistike. Aty janë gjetur tetë dysheme me mozaikë. Në këto mozaikë shumë të bukur, ka përveç kubikëve të zakonshëm me ngjyrë të bardhë, të kuqe, të zezë, të hirtë e të verdhë, mjeshtri i panjohur vendas ka përdorur me shumë aftësi edhe kubikë prej brumi qelqi të zeza dhe të gjelbërta e fortë, për ngjyrën blu të detit dhe mermerin për ngjyrën e kuqe, të cilat tregojnë se kjo godinë ka pasur gjithashtu një paraqitje të jashtme të bukur.