Keni blerë me kredi bankare një shtëpi apo pronë tjetër ?

#DES&Ju

Keni blerë me kredi bankare një shtëpi apo pronë tjetër ? Është shumë normale kjo rrugë e financimit për nevoja banese ose investimi në prona.

Por çfarë ndodh kur nuk paguani në kohë këstet e kredisë së bankës?

Banka kërkon pagesën e kësteve në kohë!

Nëse keni vështirësi në kthimin e kredisë, kërkoni ristrukturimin në kohë të saj, në bashkëpunim me bankën, që kjo e fundit të mos nisi procesin gjyqësor për ekzekutimin e kolateralit;

Ristrukturimi i kredisë ju jep mundësi të kapërceni me sukses vështirësitë financiare dhe të vazhdoni të përmbushni detyrimet tuaja.

Banka e pranon ristrukturimin e kredisë vetëm në qoftë se problemet financiare të huamarrësit duket që janë të përkohshme dhe mund të zgjidhen brenda një periudhe kohe të arsyeshme.

Ristrukturimi i kredisë bëhet i mundur vetëm nëse huamarrësi dhe banka punojnë së bashku për të arritur të njëjtin qëllim.

Asnjëra palë nuk mund të imponojë palën tjetër të pranojë kushtet e saj.

Klienti duhet të japë informacion mbi të ardhurat e rregullta dhe burime të tjera financiare, llogaritë e kursimit, investimet, kushtet e punësimit, të ardhurat familjare, perspektivat e punësimit etj., për të siguruar vlerësimin e duhur të gjendjes financiare të tij.

Gjatë negociatave të ristrukturimit, banka nuk nis procedurën për ekzekutimin e kolateralit, ose nëse e ka nisur, e ndërpret këtë procedurë.

Banka lejon një periudhë ngrirje mbi procedurat gjyqësore apo ato të ekzekutimit të kolateralit 45-90 ditë nga data e aprovimit me shkrim të huadhënësit për fillimin e negociatave të ristrukturimit.

Bankat duhet të sigurojë fshehtësinë e informacionit të marrë nga huamarrësi dhe nuk duhet të zbulojë informacione mbi huamarrësin për një palë të tretë.